Conto Pedaran

KAWIN CAI

A.    Hartina

Kawin cai nyaeta salah sahiji kabudayaan anu sok dilakonan ku warga desa Manis Kidul sareng Babakan Mulya di suku Gunung Ciremai Jawa Barat.

Ritual ieu teh ngawinkeun cai ti 7 sumur Cibulan sareng cai Balong Dhalem Tirtayatra anu jarakna kurang leuwih 5 kilometer. 7 cai sumur Cibulan ngalambangkeun pangantin lalaki, sedengkeun cai Balong Dhalem ngalambangkeun panganten istri. Cai ti 7 sumur kramat teh ngabogaan ngaran masing masing, sapertos: sumber kajayaan, kamuliaan, pangabulan, deranjana, cisadane, kamudahan sarta sumur kasalametan. Ceunah mah 7 sumur eta teh mangrupakeun paninggalan Prabu Siliwangi saentosna bertapa nungkeun cai ka nu Maha Kawasa. Kanggo warga sakitar mah, cai eta teh ngandung berkah sareng dipercaya tiasa ngobatan panyakit.

Di kolam pamandian Cibulan nu ayeuna janten tempat wisata ieu ge aya lauk nu dikeramatkeun warga anu namina lauk Kancra Bodas. Lauk anu ngaran latinna Cyprinus Carpio oge sok disebut Lauk Dewa.

B.    Fungsina

Fungsi kawin cai nyaeta:

1.    Pikeun ngahargaan sumber kahirupan, nyaeta cai.

2.    Perkawinan anu disimbolkeun ku nyatukeun 2 sumber cai teh nyaeta mangrupakeun perwujudan doa sareng harapan warga pikeun cai tetep ngalir.

3.    Dihindarkeun tina bencana kekeringan.

  

C.    Carana

Cara-cara ngalakonan kabudayaan kawin cai teh nyaeta:

1.    Ngabacakeun doa dipayuneun petilasan Prabu Siliwangi pikeun acara kawin cai teh aya dina kaayaan lancar.

2.    Kokolot Desa Manis Kidul nyandak cai ti 7 sumur kramat, lajeng dihijikeun.

3.    Saentosna ngahijikeun 7 cai sumur kramat, biasana hujan langsung turun. Percanten atawa henteu, sakitar samenit saentosna hujan sok langsung ngaguyur bumi.

4.    Cai 7 sumur diarak ka Balong Dhalem di Desa Babakan Mulya. Sapertos nyambut panganten lalaki, upacara sareng tarian husus di kawitan.

5.    Cai ti 7 sumur kramat cibulan ditumpahkeun ka cai Balong Dhalem Tirtayata.

6.    Lajeng, aparat desa anu ngurusan masalah cai tuluy dimandian, dibarengan ku harepan pikeun para aparat tiasa ngalaksanakeun tugas pangaturan cai kalayan hade.

7.    Sarengsena acara, biasana warga teh ngarebutkeun sisa cai keramat. Tuluy tuang sasarengan pikeun sukuran kanu maha kawasa.